Strategaeth Cynaliadwyedd

Cenhadaeth ac Egwyddorion Arweiniol

Datganiad Cenhadaeth Amgylcheddol

Mae prosiect Goleuo’r Gwyllt yn rhoi cynaliadwyedd amgylcheddol wrth galon ei ddyluniad a’i ddarpariaeth; mae tynnu sylw at werth yr amgylchedd naturiol yn un o’i ddibenion craidd ynghyd â chyflawni effaith gadarnhaol sylweddol y gellir ei mesur. Bydd Goleuo’r Gwyllt yn brosiect carbon bositif net, gan gyfuno patrwm o gynhyrchu allyriadau isel gyda buddsoddi yn yr hinsawdd.

Egwyddorion arweiniol

• Gadael Dim ar Ôl: Mae gennym gyfrifoldeb ar y cyd dros ddiogelu’r amgylchedd naturiol, bioamrywiaeth a’r hinsawdd: Byddwn yn ‘troedio’n ysgafn ar y tir’ yn ein holl weithgareddau, gan adael dim olion o’n cyfnod yno.
• Tu Hwnt i Sero-Net: Bydd y prosiect yn batrwm o ran cynhyrchu carbon isel, bydd yn brosiect carbon bositif net a bydd yn buddsoddi mewn natur a hinsawdd.
• Economi Gylchol: Bydd gennym bolisi dim gwastraff, byddwn yn defnyddio cyn lleied â phosibl o adnoddau o ffynonellau cynaliadwy, byddwn yn cynllunio ar gyfer ailddefnyddio ac ail-bwrpasu deunyddiau, a byddwn yn arloesi yn ein harferion a’n technoleg
• Ysbrydoli: Byddwn yn tynnu sylw at harddwch, gwerth ac amrywiaeth rhywogaethau y mae ein tirweddau’n gartref iddynt, ac yn adrodd ein stori cynaliadwyedd.
• Tryloywder: Byddwn yn mesur ac yn adrodd ar ein holl effeithiau, cadarnhaol a negyddol.

Sut byddwn yn gwneud hyn

Gweledigaeth a chynllunio

Byddwn yn gosod gweledigaeth a systemau clir ar gyfer y prosiect, sy’n rhoi nod cyffredin i bawb anelu ato a fframwaith clir i weithio o’i fewn, sy’n cynnwys:

• Byddwn yn gweithio gyda rhanddeiliaid allweddol – partneriaid ein prosiect, cynghorwyr creadigol, cynhyrchwyr a’r tîm cynhyrchu – yn gynnar yn y broses, i atgyfnerthu’r weledigaeth, y strategaeth a’r polisïau a fydd yn sail i’n systemau a’n harferion.
• Byddwn yn cynnal asesiad o’r effaith amgylcheddol ar gyfer pob lleoliad sydd wedi ei gadarnhau yn y Parciau Cenedlaethol a’r Ardaloedd o Harddwch Naturiol Eithriadol
• Byddwn yn creu dogfennau clir sy’n cyfleu safonau ac arferion y prosiect i staff mewnol a chontractwyr:
  – Polisi Caffael
  – Llawlyfr Cynaliadwyedd y Prosiect
  – Rhestr Wirio Rheolwyr Cynhyrchu
  – Cynllun Monitro, Adrodd a Gwerthuso

Canfod, rheoli, mesur ac adrodd ar effeithiau

Mae Goleuo’r Gwyllt yn gyfres o ryw 20 o ddigwyddiadau celf cyfranogol a gynhelir ar dirweddau ar hyd a lled Prydain Fawr a Gogledd Iwerddon. Bydd diweddglo’r prosiect yn ffilm a fydd yn cael ei darlledu, bydd rhan ohoni wedi cael ei recordio ymlaen llaw a bydd rhan ohoni’n ddigwyddiad byw. Mae disgwyl i dros 20,000 o bobl gymryd rhan yn y prosiect.

Gweithgareddau ac effeithiau:

• Teithio a thrafnidiaeth: ymweliadau safle, cynhyrchu digwyddiadau, cyfranogwyr – amcangyfrifir y bydd yr effaith fwyaf oddeutu 65 tunnell dros oes y prosiect (Cyfeirnod: Asesiad Allyriadau Carbon Teithio Goleuo’r Gwyllt)
• Adnoddau cynhyrchu: papur swyddfa, defnyddiau traul (ee tapiau, ceblau, beiros), dŵr, toiledau, pŵer, dur, pren ac ati.
• Prosesau gweithgynhyrchu sy’n gysylltiedig â’r dechnoleg (y tu hwnt i’r cwmpas ar gyfer mesur ac adrodd – canolbwyntio ar naratif arloesi)
• Difrod i’r dirwedd: erydiad, sbwriel (mater o’i le), amharu ar y tir
• Llygredd golau: Byddwn yn cyflwyno ymyriadau goleuadau dros dro yn y dirwedd. Bydd y goleuadau’n cael eu defnyddio am lai na 30 munud, yn y cyfnos, ac ni fyddant yn cael eu defnyddio yn y tywyllwch. Mae’r gwaith cynllunio ar gyfer y prosiect o’r camau cynharaf wedi elwa ar fewnbwn swyddogion y Parc Cenedlaethol sy’n ymwneud ag achrediadau Awyr Dywyll Ryngwladol. Mae ein partner technoleg Siemens, sy’n dylunio’r goleuadau, wedi bod yn gweithio yn unol â chanllawiau technegol a manylebau a ddarparwyd gan arweinydd Awyr Dywyll Parciau Cenedlaethol y Deyrnas Unedig.
• Ôl troed digidol – storio yn y cwmwl, cyfarfodydd ar-lein, darlledu (cyfeirnod Canllaw Ôl Troed Digidol WTP)
• Deunyddiau cyfathrebu – brandio, deunyddiau wedi’u hargraffu, baneri, sgrim, ac ati

Byddwn yn pennu targedau CAMPUS uchelgeisiol a chyraeddadwy (Penodol, Mesuradwy, Cyraeddadwy, Synhwyrol ac Amserol) ar gyfer cynaliadwyedd ar y cychwyn cyntaf, a byddwn yn canolbwyntio ar y prif dargedau sy’n ymwneud â holl effeithiau’r prosiect:

• Prif darged: Carbon net bositif (cwmpasau 1 a 2)
• Teithio: Targed bod y rhan fwyaf o gyfranogwyr yn rhannu ffyrdd o deithio (dros 80%), mesur effaith teithio’n gywir ar draws y prosiect, nifer y cyfranogwyr sy’n llwytho’r Ap Teithio ecolibrium i lawr.
• Ynni: 100% o ynni adnewyddadwy ar draws y prosiect (swyddfeydd a lleoliadau cynhyrchu WTP).
• Defnyddio adnoddau: Polisi Dim Gwastraff – dim defnydd untro drwy gydol y prosiect, a dilyn yr hierarchaeth gwastraff.
• 1 x buddsoddiad neu brosiect sy’n canolbwyntio ar natur ym mhob rhanbarth (gyda phartneriaid presennol lle bo hynny’n bosibl).
• 50%+ o dros 20,000 o’r cyfranogwyr yn teimlo budd cadarnhaol o’r profiad mewn perthynas â natur a’r amgylchedd*
• Cadwyn gyflenwi: 100% o gontractwyr yn bodloni safonau sylfaenol WTP a nodir yn y Polisi Caffael.

*Fel y nodir yn yr Astudiaeth Dichonoldeb. Edrychwch ar Gynllun Mesur, Adrodd a Gwerthuso Goleuo’r Gwyllt i gael rhagor o fanylion am hyn a thargedau eraill.

Cyflawni

Mae gennym gyfrifoldeb ac atebolrwydd clir dros gyflawni ein nodau a’n targedau cynaliadwyedd yn y rolau a’r strwythur:

Byddwn yn hyfforddi’r holl weithwyr ac aelodau craidd tîm y prosiect i sicrhau dealltwriaeth a chymhwysedd da drwy roi’r canlynol ar waith:

• Hyfforddiant wedi’i gymeradwyo gan y Prosiect Llythrennedd Carbon (gweithwyr, Rheolwr Gweithrediadau, Cynhyrchwyr)
• Llawlyfr Cynaliadwyedd Cynhyrchu
• Bydd cynaliadwyedd yn eitem sefydlog ar agenda cyfarfodydd Tîm Cynhyrchu’r prosiect, gyda’r aelodau hefyd yn rhan o’r Tîm Gweithredu Cynaliadwyedd – gweler y goeden reoli uchod.

Cyfathrebu

Bydd y tîm Cyfathrebu yn gosod amcanion a thargedau CAMPUS ar gyfer cynaliadwyedd mewn perthynas â marchnata a chyfathrebu, fel rhan o Strategaeth ehangach Goleuo’r Gwyllt ac yn gweithio’n agos gyda’r Rheolwr Cynaliadwyedd i gynllunio ac i gyflawni’n unol â hynny.

Bydd cyfathrebu mewnol yn atgyfnerthu negeseuon am natur hanfodol a phwysigrwydd llwyddiant ein Strategaeth Cynaliadwyedd drwy gamau gweithredu:

• Mae’r Rheolwr Marchnata yn aelod gweithredol o Dîm Gweithredu Cynaliadwyedd prosiect Goleuo’r Gwyllt.
• Bydd y tîm marchnata a chyfathrebu craidd yn cael hyfforddiant llythrennedd carbon.
• Rhannu’r weledigaeth a’r cynlluniau â holl aelodau’r tîm yn gynnar yn y broses gynllunio, ac fel rhan o sesiynau briffio a disgrifiadau swydd.
• Darparu’r wybodaeth ddiweddaraf i’r tîm i atgyfnerthu a dathlu cerrig milltir drwy gydol y prosiect.

Bydd cyfathrebu allanol yn cefnogi diwylliant o ymwybyddiaeth ymysg yr holl randdeiliaid ynghylch gweledigaeth, strategaeth a gofynion y prosiect. Bydd cyfathrebu’r egwyddorion a’r camau gweithredu cynaliadwyedd yn cael ei gynnwys mewn cyfathrebiadau cyhoeddus i’r Goleuwyr, gwirfoddolwyr, partneriaid, grwpiau sy’n ymwneud â’r rhaglen Dysgu ac Ymgysylltu a’r cyfryngau.

Bydd y tîm cyfathrebu yn gweithio gyda’r Rheolwr Cynaliadwyedd i nodi gofynion casglu data er mwyn mesur effaith carbon gweithgareddau marchnata a chyfathrebu i gyflawni’r nod positif net gan gynnwys gweithgareddau marchnata digidol, ee gwefan, e-gylchlythyrau, cyfryngau cymdeithasol.

Rheoli’r Gadwyn Gyflenwi

Rydyn ni’n gweithio gyda phartneriaid arloesol ac mae gennym fesurau ar waith i gynnal safonau amgylcheddol ar draws y gadwyn gyflenwi:

• Rhannu gweledigaeth ein prosiect i ysbrydoli rhanddeiliaid i ymuno â’n diwylliant o ymrwymiad i gynaliadwyedd ac arloesedd.
• Bydd y Polisi Caffael yn nodi safonau sylfaenol.
• Monitro pob cyflenwr – byddwn yn rhoi’r offer a’r systemau iddynt i ddarparu gwybodaeth er mwyn integreiddio â’n gwaith adrodd ar effaith.
• Telerau ac Amodau – rhwymedigaethau cytundebol sy’n ymwneud â’n gofynion monitro a pholisi caffael.

Asesu ac Adrodd

Mae gennym systemau effeithiol ar waith i fesur ac i adrodd a fydd yn galluogi’r prosiect i adrodd ar effeithiau a’u cyfleu’n dryloyw:

• Mae’r Cynllun Monitro, Adrodd a Gwerthuso’n rhoi trosolwg a’r systemau i gasglu ac i reoli data.
• Rydyn ni’n defnyddio Teclyn Gwyrdd y Diwydiant Creadigol i adrodd ar allyriadau.
• Bydd y prosiect yn garbon bositif net. Byddwn yn osgoi allyriadau lle bynnag y bo modd, ac yn cydbwyso allyriadau nad oes modd eu hosgoi – a mwy na’r hyn y mae’r prosiect yn gyfrifol amdano – drwy fuddsoddi mewn mesurau lliniaru carbon ardystiedig (ee plannu coed) yn y DU.

Ar ddiwedd y prosiect, byddwn yn cynhyrchu Adroddiad ar Effaith sy’n bodloni rhwymedigaethau’r contract, ac sydd ar gael i’r cyhoedd/sy’n cael ei rannu â’r holl randdeiliaid. Bydd yn cynnwys adrodd ar allyriadau, gwerthuso nodau’r prosiect, a dathlu llwyddiannau.

Crynhoi Dogfennau ac Offer Allweddol

• Strategaeth Cynaliadwyedd – trosolwg o nodau, dull gweithredu a chyflawni
• Polisi Caffael – canllawiau ar brynu ar draws prosiect(au)
• Cynllun Monitro, Gwerthuso ac Adrodd – beth i’w fesur a sut, gan gynnwys asedau (ee taenlen ar gyfer cofnodi data)
• Llawlyfr Cynaliadwyedd Cynhyrchu – beth, pam a sut i Reolwyr Cynhyrchu
• Rhestr Wirio Rheolwyr Cynhyrchu